Dagbreek Lirieke

iconKRY MY
Wat kan ek sê, daar’s ‘n knop in my keel
Wat kan ek skryf in die volgende reël
Wat kan ek sê, ek is klaar gepraat
Waar gaan ek heen, dis ‘n doodloopstraat
Waar is die vlam, dis ‘n pikswart pad
Waar is die lig, dis ‘n duistere gat
Wie kan my red as die donker daal?
Wie is die een wat vir my kom haal?
Ek lees die koerant, dis net moord en roof
Ek luister die nuus, maar ek hou my doof
Ek sit aan die kassie dis ‘n groot lawaai
Vat my liewer op ‘n Kaapse draai
Gee my die wind, gee my die son
Gee my die reën as die winter kom
Gee my die vlaktes in die ou Transvaal
Gee my jou liefde as die donker daal
Ek mis jou lag as ek grappies maak
Ek mis jou oë wat aan die hemel raak
Ek mis jou lyf wat myne wil hê
Ek mis jou asem as jy langs my lê
Want jy is die vlam op ‘n pikswart pad
Jy is die lig in ‘n duistere gat
Jy kan my red as die donker daal
Jy is die een wat vir my kom haal
Jy kan my kom haal


iconSUSTERLIEFDE
As ek dink aan susterliefde, dan dink ek net aan jou
as die wêreld om my ratel, as die donkerte my toevou
dan sien ek weer die duine, ek sien die branders en die son
die vonkel in jou oë, die lig op my horison
As die vreugde in my opwel, of die trane vlak kom lê
dan weet ek jy was ook hier, jy verstaan wat stilte sê
om vry te wees en lief te hê, uit volle bors te sing
dan lag jy oopmond en ek weet: niks kan groter vreugde bring
As ek dink aan wilde woorde, dan dink ek ook aan jou
as die watervalle opdroog, of die blare val in rou…
dan sien ek weer die duine, ek sien die branders en die son
die vonkel in jou oë, die lig op my horison
As ek dink aan susterliefde, dan dink ek net aan jou
as die wêreld om my ratel, as die donkerte my toevou
dan sien ek weer die duine, ek sien die branders en die son
die vonkel in jou oë, die lig op my horison


iconGAAN EK OOIT?
Gaan ek ooit ‘n boek skryf?
Gaan ek al my spoke verdryf?
Die spoke wat bly in my hart se laai
En my gevoelens met ‘n leuen verraai
Gaan ek ooit sukses smaak?
Gaan ek aan die wenpaal raak?
Gaan my lewe ooit nuttig wees?
Gaan die nageslag my onthou?
As ek sing van die liefde, sing van die dood
As ek sing van die stilte in die Groot Karoo
As ek sing van dinge wat saakmaak,
dinge wat diep lê binne jou
As ek sing van die vreugde, sing van die pyn
Sing van die liggies wat jou hart omlyn
Sing van dinge wat heelmaak
Vrede kan bring vir jou en my
Gaan ek ooit myself ken?
Gaan ek ooit miljoene wen?
Gaan ek ooit die huis by die see bou
Waarvan ek jare lank al droom?
Gaan ek ooit ‘n slag slaan?
Gaan ek ooit my hart verstaan?
Gaan ek ooit ‘n verskil kan maak
in die wêreld rondom my?


iconKAATJIE VAN DIE BAAN
Die wind waai troosteloos deur bome, blare val
skroeiend vlammend, skreiend brandend, sonlig knal
die stilte versplinter, kil en onbemin draai die maan haar rug, die middag sug.
Maar…gisteraand was sy weer kaatjie van die baan
met haar wye kantmoue, haar goud en haar saffraan
soos ‘n oosterse godin, ‘n diva van die nag
het sy die skares wild gehad met haar prag
en sy’t gesing van haar liefde, haar pyn en haar leed
en haar onvermoë om te vergewe en vergeet
en toe die laaste akkoord wegsterf in die wind
toe staan sy alleen soos ‘n verdorwe kind
Sy opeens die volk se liefling, nou verloën
eens verafgod, hoog verhewe, nou ‘n bron van hoon
die son se strale laat haar bleek lyk teen die blou
waaraan sy verbete klou.
Maar…vanaand is sy weer kaatjie van die baan
met haar wye kantmoue, haar goud en haar saffraan
soos ‘n oosterse godin, ‘n diva van die nag
sal sy die skares wild maak met haar prag
en sy sal sing van haar liefde, haar pyn en haar leed
en haar onvermoë om te vergewe en vergeet
en as die laaste akkoord wegsterf in die wind
dan staan sy alleen soos ‘n verdorwe kind


iconHANG EK HALFLYF
Ek gaan vir julle nou ‘n tere liedjie sing
Van die wêreld waar ons leef en die kleure wat dit bring
Wat warm was is koud, wat koud was is nou lou
Tieners word geskei en oumas staan op…
Nou hang ek halflyf tussen die hemel en die hel
Met baie om te sê maar niks om te vertel
Nou loop ek toe oë oor ‘n styfgespande tou
En die hemel alleen weet of my anker my gaan hou
Die verlede is ‘n ding wat ek bitter min van weet
En wat ek eens geleer het het ek lankal reeds vergeet
Die toekoms is ‘n nar met ‘n apie in sy mou
En as die wiele draai, dan lag hy in sy
Nou hang ek halflyf…
Die liefde is ‘n ding wat ek bittermin van weet
Gaan hy jou onthou, of het sy jou vergeet?
En somtyds spreek jy vry, en somtyds moet jy klou
En die vlamme moet jy stook, of die vuurtjie brand te
Nou hang ek halflyf…


iconSAARTJIE
Wie is die meisie met die sagte stem?
As jy haar hoor, sal jy haar ken?
Wie is die engel met die donker oë
wat in kettings in die straat afloop?
Saartjie, Saartjie
kom speel weer saam met my op Kaapse duine
Saartjie, Saartjie
jy’t jou rus gevind, maar waar is myne?
As jong vrou is sy meegevoer
deur leë beloftes van weelde en roem
Haar wêreld moes sy agterlaat
uitgestal soos ‘n dier op straat


iconSIEN JY NOU?
My vere word gepluk meneer
My woorde word gesluk meneer
My arm word gedraai meneer
My kinders afgemaai meneer
My wese word geruk meneer
My mense gaan gebuk meneer
My vryheid word verswelg meneer
My skuld word nooit gedelg meneer
Die liefde het gewyk meneer
Dis haat net waar jy kyk meneer
My dae word stadig afgetel en
elkeen bring ‘n nuwe hel
My deure word gesluit meneer
My spore word gestuit meneer
My stem is ‘n masjiengeweer meneer
Sien jy nou?
My strome is nou stil meneer
My mense het geen wil meneer
My diere lê vermink meneer
My beker is geskink meneer
My land is kaal geskeer meneer
Gestroop voor ek kon keer meneer
Met hande skurf en kaal sê ek meneer
Sien jy nou?
My hart is ‘n hotel meneer
Jou sente vir my vel meneer
My kop ‘n katedraal waar my
Verlede doelloos dwaal meneer
Die vensters tot my siel meneer
Is stukkend en verniel meneer
My lied weerklink vir ewig in die niet
Sien jy nou?


iconMY GELIEFDE
Ek verstik in my liefde
my woorde word ‘n klont wat vashaak in my keel
Ek verstik in my liefde
my lippe word die deur waarteen my sinne hamer
Ek verdrink in my liefde
my hartstog word die hand wat my afvat na die dieptes
Ek verdrink in my liefde
my gevoelens word die golf wat my teen die grond verpletter
Maar ek wag, ek wag vir jou, Geliefde
Maar ek wag, ek wag vir jou, my Lief
Ek verbrand in my liefde
my verlange word die vlam wat lek-lek aan my voete
Ek verbrand in my liefde
my passie word die vuur wat my verskroei in aardse woede
Ek verdwaal in my liefde
my gedagtes word die doolhof waar die mure in my vasloop
Ek verdwaal in my liefde
my vrees is ‘n woestyn waar die stilte swyg in wanhoop
Maar ek wag, ek wag vir jou, Geliefde
Maar ek wag, ek wag vir jou, my Lief
Ek vertrou in jou liefde
jou liefde is die hand wat my terugbring na die lewe
Ek vertrou in jou liefde
jou liefde is my stem wanneer my woorde my begewe


iconJY IS DIE EEN
Jy is die een wat my wortels voed met sagte, donker grond
Jy is die een wat my stam omhels – ek voel jou lippe teen my mond
Jy is die een wat in my mik kom lê, dan praat ons land en sand
Jy is die een wat in my koelte klim as die son se strale brand
Jy is die een wat jou vlerke sprei en na verre lande reis
Jy is die een wat jou stem laat hoor as jy die God van vryheid prys
Jy is die een wat elke keer terug na my toe kom
Jy is die een wat jaar na jaar in my droë woestynland blom
Jy is die een
Jy is die een wat my hartklop hoor soos ‘n baken in die nag
Jy is die een wat my kop verstaan en saam met my kan lag
Jy is die een wat ek teen my dra soos ‘n pasgebore kind
Jy is die een wat die naelstring knip en my hegter aan jou bind
Jy is die een wat soos ‘n ma die wêreld vir my wys
Jy is die een, my bondgenoot op hierdie lewensreis
Jy is die een
Jy is die een wat my hartklop hoor soos ‘n baken in die nag
Jy is die een wat my kop verstaan en saam met my kan lag
Jy is die een wat my moed inpraat as die storms aan my ruk
Jy is die een, die enigste een – jy is my geluk


iconHUISIE
My hele lewe lank bou ek ‘n huisie
Ek bou die mure so steentjie vir steentjie
(steentjie vir baksteentjie)
My hele lewe lank droom ek ‘n droompie
ek slaap so salig hier onder my boompie
My hele lewe lank klim ek ‘n leertjie
wat wag vir my op die volgende treetjie?
My hele lewe lank loop ek ‘n paadjie
Ek loop te lank al so sonder ‘n maatjie
En ek bou maar ek kom nooit klaar
En ek klim maar ek is nooit daar
En ek droom maar ek staan nooit op
En ek loop so deur my
loop so deur my kop


iconJY VERLAAT MY
Ek is vir jou gebore, ek is vir jou bedoel
Ek is vir jou beskore, maar kyk nou wat jy doen
Jy verlaat my
Jy het jou hart belowe, maar kyk nou wat jy doen
Jy verlaat my
‘n Voëltjie sprei sy vlerke, hy weet wat hy wil hê
My liefde ken geen perke, maar jy gaan my hier laat lê
Jy verlaat my
Jy het jou hart belowe, maar kyk nou wat jy doen
Jy verlaat my


iconVOOR JOU
Voor jou was die wolke grys
was daar wagte voor my paradys
Voor jou was die aarde plat
met slegte weer op Ararat
Voor jou was Babilon
die stil een wat nooit uit wou kom
Voor jou het die werklikheid verweer
Voor jou was die liefde
‘n Parysenaar met ‘n lang sigaar
Voor jou het donderweer
my Notre Dame in twee laat skeur
Voor jou het sonneblom
gesmeek dat somer uit moes kom
Voor jou het die werklikheid verweer


iconCITY OF JOY
I came to a castle in the clouds
surrounded by land and sea
Mountains lay like giants at my feet
in this land where I chose to be
Fallen angels came to dance in the street
and loneliness came to play
Lovers danced to a different beat
in this land I chose to stay
It’s a city of joy, it’s a city of peace
it’s a city of brotherhood and love
It’s a city of light, it’s a city where everyone is shining
It’s a city of tears, it’s a city of grief
it’s a city of uninvited violence
It’s a city so dark, it’s a city where everyone is drowning
Everyone is drowning
I live in a castle in the clouds
surrounded by land and sea
Light falls like water at my feet
in this land where I choose to be
Fallen angels come to dance in the street
and loneliness comes to play
Lovers dance to a different beat
in this land that I name
It’s my city of joy…
I’ll fly from my castle in the clouds
surrounded by land and sea
Tears will fall like raindrops at my feet
in this land that I’ll choose to leave
Fallen angels will come to dance in the street
and loneliness will come to play
Lovers will dance to a different beat
in this land that I name
It’s my city of joy…


iconDAGBREEK
Sterre flonker, lig die donker
Skyn op water, son kom nader
Dagbreek
Bome fluister, wolke luister
Sonlig filter, hart klop wilder
Dagbreek


iconSÊ DIT
Sê dit in ‘n brief, sê dit in ‘n woord
Sê dit in ‘n sin, die digterlike soort
Sê dit as dit reën, sê dit as dit hael
Sê dit as die donker daal
Sê dit in ‘n kyk, sê dit in ‘n lag
Sê dit op ‘n wilde onweersdag
Sê dit in ‘n traan, sê dit in ‘n sug
Sê dit as die donker vlug
Sê dit vir my
Sê dit in ‘n woud, sê dit op ‘n strand
Sê dit as die wêreld om jou brand
Sê dit in die lig van ‘n katedraal
Sê dit as die donker jou kom haal
Sê dit op ‘n berg, sê dit in ‘n kloof
Sê dit as die stilte jou beroof
Sê dit in die nag as die sterre jou verblind
As die donker jou uiteindelik vind
Jy gaan by my bly